Continue on Our Mobile App

મહેસાણા: મહેસાણા તાલુકાના મુલસણ ખાતે ધરતી રિસોર્ટમાં પરિવાર સાથે નિવૃત્ત જીવન ગાળતા 78 વર્ષીય કેશવરામ કાલુરામ મનીરામ સાયબર ઠગાઈનો ભોગ બન્યા હોવાની ફરિયાદ સામે આવી છે. ઇલેક્શન કાર્ડમાં નામની વિસંગતતા સુધારવાના બહાને એક અજાણ્યા વ્યક્તિએ પોતે દિલ્હીના ઇલેક્શન ઓફિસર હોવાનું જણાવી વૃદ્ધનો વિશ્વાસ જીત્યો હતો. ત્યારબાદ વોટ્સએપ મારફતે શંકાસ્પદ લિંક મોકલી ઓનલાઇન વેરિફિકેશનની પ્રક્રિયા કરાવવામાં આવી હતી. ફરિયાદ મુજબ, આ સમગ્ર પ્રક્રિયા દરમિયાન વૃદ્ધના મોબાઇલ અને બેંકિંગ સંબંધિત વિગતોનો દુરુપયોગ કરી બેંક ખાતાઓમાંથી કુલ ₹17,78,659.32 ઉપાડી લેવામાં આવ્યા હતા. દિલ્હીના ઇલેક્શન ઓફિસર તરીકે ઓળખ આપી સંપર્ક કર્યો ફરિયાદ મુજબ, 29 જુલાઈના રોજ કેશવરામના મોબાઇલ પર એક મેસેજ આવ્યો હતો. તેમાં તેમના તથા તેમના પિતાના ઇલેક્શન કાર્ડમાં નામને લગતી ભૂલ હોવાનું જણાવી એક મોબાઇલ નંબર પર સંપર્ક કરવા જણાવાયું હતું. ત્યારબાદ 31 જુલાઈના રોજ વૃદ્ધે આપેલા નંબર પર સંપર્ક કર્યો હતો. સામેથી વાત કરનાર વ્યક્તિએ પોતાનું નામ ચંદ્રશેખર હોવાનું અને પોતે દિલ્હીના ઇલેક્શન ઓફિસર તરીકે ફરજ બજાવતો હોવાનું જણાવ્યું હતું. વોટ્સએપ પર શંકાસ્પદ લિંક મોકલી ફરિયાદ અનુસાર, વેરિફિકેશનના નામે વૃદ્ધને વોટ્સએપ પર ‘voter-re-verification-online.web.app’ નામની લિંક મોકલવામાં આવી હતી. લિંક ઓપન કરીને વૃદ્ધે તેમાં ઓનલાઇન ફોર્મ ભર્યું હતું. આ દરમિયાન સામેથી વાત કરનાર વ્યક્તિએ વોટ્સએપ વીડિયો કોલ પણ કર્યો હતો, જોકે તેણે પોતાનો કેમેરો બંધ રાખ્યો હોવાનું ફરિયાદમાં જણાવાયું છે. ₹5નું પેમેન્ટ કરાવવા પ્રયાસ કરાવ્યો ઓનલાઇન પ્રક્રિયાના ભાગરૂપે માત્ર ₹5નું પેમેન્ટ કરવાનું જણાવવામાં આવ્યું હતું. વૃદ્ધે UPI મારફતે પેમેન્ટ કરવાનો પ્રયાસ કર્યો હતો, પરંતુ પેમેન્ટ સફળ થયું ન હતું. ત્યારબાદ ફરિયાદ મુજબ, ઠગે વૃદ્ધ પાસેથી બેંકિંગ સંબંધિત વિગતો અને ATM કાર્ડનો PIN મેળવી લીધો હતો. આશરે દોઢ કલાક સુધી વાતચીત દરમિયાન મોબાઇલ ફોન હેક કરવામાં આવ્યો હોવાનો પણ ફરિયાદમાં આક્ષેપ કરવામાં આવ્યો છે. બેંક ખાતામાંથી લાખો રૂપિયા ઉપડી ગયા મોબાઇલ હેક થયો હોવાની શંકા જતા વૃદ્ધે ગણપત યુનિવર્સિટીમાં પ્રિન્સિપાલ તરીકે નોકરી કરતા તેમના પુત્ર ગીરીરાજને ઘરે બોલાવ્યા હતા. મોબાઇલને ફ્લાઇટ મોડ પર મૂકવામાં આવ્યો હતો. પરંતુ થોડા સમય બાદ ફ્લાઇટ મોડ હટાવતા બેંક ખાતામાંથી રકમ ઉપડ્યાના મેસેજ આવવા લાગ્યા હતા. પરિવાર દ્વારા તપાસ કરતાં AU સ્મોલ ફાઇનાન્સ બેંકના બે ખાતામાંથી અનુક્રમે ₹1.57 લાખ અને ₹14.87 લાખ, જ્યારે યસ બેંકના ખાતામાંથી ₹1.33 લાખ ઉપાડવામાં આવ્યા હોવાનું સામે આવ્યું હતું. આ રીતે કુલ ₹17,78,659.32ની રકમ ડેબિટ થઈ હોવાનું ફરિયાદમાં જણાવાયું છે. 1930 હેલ્પલાઇન પર જાણ કરી, પોલીસ ફરિયાદ નોંધાઈ ઘટનાની જાણ થતાં પીડિત પરિવારે તાત્કાલિક સાયબર ક્રાઇમ પોલીસનો સંપર્ક કર્યો હતો અને 1930 સાયબર ક્રાઇમ હેલ્પલાઇન પર પણ જાણ કરી હતી. પરિવાર દ્વારા બેંક ખાતાઓ બ્લોક કરાવવાની કાર્યવાહી કરવામાં આવી હતી. ત્યારબાદ ઓનલાઇન ઈ-FIR નોંધાવવામાં આવી હતી અને લાંઘણજ પોલીસ મથકે સમગ્ર મામલે વિધિવત ફરિયાદ નોંધાઈ છે. પોલીસે ફરિયાદના આધારે મોબાઇલ નંબર 9864053725 અને 8638760349ના ધારકો સામે ગુનો નોંધી તપાસ હાથ ધરી છે. ઠગાઈમાં અન્ય લોકોની સંડોવણી છે કે કેમ તથા રકમ કયા ખાતાઓમાં ટ્રાન્સફર થઈ છે તે સહિતની બાબતો અંગે પોલીસ તપાસ કરી રહી છે.