Continue on Our Mobile App

થરાદ: બનાસકાંઠાના થરાદ નજીક ભારતમાલા હાઇવે પર આજે, 27 સપ્ટેમ્બરની વહેલી સવારે ગમખ્વાર અકસ્માત સર્જાયો હતો. રાજકોટથી રાજસ્થાન તરફ જઈ રહેલી રેન્જરોવર કાર (GJ03DD0788) રસ્તા પર અચાનક આવેલા આખલા સાથે અથડાઈ હતી. ત્યારબાદ કાર ડિવાઇડર સાથે અથડાતા અકસ્માતમાં કારમાં સવાર ત્રણ યુવકો પૈકી બેના મોત થયા હતા, જ્યારે એક યુવક ગંભીર રીતે ઈજાગ્રસ્ત થયો હતો. પ્રાપ્ત માહિતી મુજબ, થરાદ-ડીસા હાઇવે પર માલપુર નજીક સવારે આશરે 4થી 4:15 વાગ્યાના સમયગાળામાં આ અકસ્માત થયો હતો. રેન્જરોવર કારની આખલા સાથે જોરદાર ટક્કર થયા બાદ કાર ડિવાઇડર સાથે અથડાઈ હતી. અકસ્માત એટલો ગંભીર હતો કે કારના ટુકડા રસ્તા પર વેરવિખેર થઈ ગયા હતા. અકસ્મતની જાણ થતાં આસપાસના લોકો ઘટનાસ્થળે દોડી આવ્યા હતા અને 108 ઇમરજન્સી સેવાને જાણ કરી હતી. 108ની ટીમે કારમાં સવાર ત્રણેય યુવકોને થરાદની સરકારી હોસ્પિટલમાં પહોંચાડ્યા હતા. થરાદ સરકારી હોસ્પિટલના તબીબ ડૉ. કૃણાલ માલોસણીયાના જણાવ્યા મુજબ, તબીબી તપાસ દરમિયાન અમરેલીના દિવ્યજીત અને રાજકોટના યુવરાજસિંહને મૃત જાહેર કરવામાં આવ્યા હતા. જ્યારે રાજકોટના હરદીપસિંહ નામના યુવકને ગંભીર ઈજાઓ પહોંચી હોવાથી પ્રાથમિક સારવાર બાદ વધુ સારવાર માટે અમદાવાદ રિફર કરવામાં આવ્યો હતો. બંને મૃતકોના મૃતદેહને પોસ્ટમોર્ટમ માટે થરાદ સિવિલ હોસ્પિટલ ખાતે ખસેડવામાં આવ્યા હતા. અકસ્માત અંગે પોલીસે વધુ તપાસ હાથ ધરી છે. દરમિયાન, બનાસકાંઠા જિલ્લા કોંગ્રેસ પ્રમુખ ગુલાબસિંહ રાજપૂતે અકસ્માત અંગે પ્રતિક્રિયા આપી હતી. તેમણે ભારતમાલા હાઇવે પર રખડતા પશુઓના મુદ્દે માર્ગ સુરક્ષા અંગે સવાલો ઉઠાવ્યા હતા અને NHAIની વ્યવસ્થા અંગે આક્ષેપો કર્યા હતા. જોકે, આ આક્ષેપો અંગે સંબંધિત તંત્ર તરફથી સત્તાવાર પ્રતિક્રિયા મળવાની બાકી છે. થરાદ નજીક બનેલી આ ઘટનાએ હાઇવે પર રખડતા પશુઓ અને માર્ગ સુરક્ષાના મુદ્દાને ફરી એકવાર ચર્ચામાં લાવ્યો છે.