Continue on Our Mobile App

VADNAGAR : વડનગરમાં ફરી એક વાર કાયદો અને વ્યવસ્થા કથળી હોવાની ઘટના સામે આવી છે..અસામાજિક તત્વોએ ફરી માથું ઉચક્યું છે. રસ્તા પર થયેલી સામાન્ય બોલાચાલીમાં યુવક પર છરીથી હુમલો કરવામાં આવ્યો હોવાની ફરિયાદ નોંધાઈ છે. વડનગરના નવા બસ સ્ટેશન સામે અને ત્યારબાદ કાળકામાતાના ઢાળ પાસે આ સમગ્ર ઘટના બની હોવાનો ફરિયાદમાં ઉલ્લેખ છે. ફરિયાદ મુજબ, 28 સપ્ટેમ્બરની રાત્રે આશરે સાડા દસ વાગ્યે ફરિયાદી અને સાહેદ નવા બસ સ્ટેશન પાસેથી પસાર થઈ રહ્યા હતા. ત્યારે ચાર શખ્સોએ તેમની મોટરસાયકલ પાસે ગાડી ઉભી રાખી ઇયરફોન બાબતે બોલાચાલી કરી ધોકા વડે માર માર્યો હતો. ત્યારબાદ ફરિયાદી અને સાહેદ કાળકામાતાના ઢાળ તરફ જતા હતા ત્યારે આરોપીઓ ફરી રસ્તામાં ગાડી ઉભી રાખીને ચારેય શખ્સોએ ગાળો બોલી બોલાચાલી કરી હતી અને ગાળો બોલવાની ના પાડતા ચાર પૈકી કોઈ એક શખ્સે ફરિયાદીના બરડાના ભાગે છરી મારી ઈજા પહોંચાડી સાથે જ જાનથી મારી નાખવાની ધમકી આપી હતી.

              આ મામલે વડનગર સ્માર્ટ પોલીસ સ્ટેશનમાં ભારતીય ન્યાય સંહિતા-2023ની કલમ 115(2), 118(1), 352, 351(3), 54 તથા જી.પી. એક્ટ કલમ 135 મુજબ આરોપી તરીકે ડી.જે. ઠાકોર, સહીલ મોદી, સંજય ઠાકોર અને ભરતજી ઠાકોર, તમામ રહે. વડનગર, તા. વડનગર, જી. મહેસાણા વિરુદ્ધ ગુનો નોંધવામાં આવ્યો છે. ફરિયાદીના આક્ષેપ મુજબ ભરત ઠાકોર અગાઉ પણ મારામારીના કેસમાં સંડોવાયેલો છે. તેમજ દારૂનો વેપલો જેવી પ્રવૃતિઓ સાથે સંકળાયેલો છે. મોદીના વડનગરને અસામાજિક પ્રવૃત્તિઓનો અડ્ડો બનાવનારા આવા તત્વો વિરુદ્ધ કાર્યવાહી થશે કે કેમ ?