Continue on Our Mobile App

મહેસાણા જિલ્લાના ખેરાલુ તાલુકાના લીમડી ગામે ખેતરમાં ચાલી રહેલા મોટા જુગારધામ પર ગાંધીનગર સ્ટેટ મોનિટરિંગ સેલે દરોડો પાડ્યો હતો. બાતમીના આધારે SMCની ટીમે પંચો સાથે દરોડો પાડતા સ્થળ પર નાસભાગ મચી ગઈ હતી. જોકે પોલીસે જુગાર રમાડનાર અને રમનાર સહિત કુલ 18 શખ્સોને ઝડપી પાડ્યા હતા. પોલીસના જણાવ્યા મુજબ, સ્થળ પરથી રૂ.1 લાખ 26 હજારથી વધુ રોકડ, 16 મોબાઇલ ફોન અને ચાર ફોર-વ્હીલર સહિત વાહનોનો જથ્થો મળી આવ્યો હતો. આ ઉપરાંત CNG રિક્ષા, ત્રણ મોટરસાયકલ, જુગારના બોર્ડ, કોઈન્સ અને ગંજીપાનાં પેકેટ્સ પણ જપ્ત કરવામાં આવ્યા છે. સમગ્ર કાર્યવાહીમાં પોલીસે કુલ રૂ.24 લાખ 63 હજારથી વધુનો મુદ્દામાલ જપ્ત કર્યો છે. જોકે દરોડા દરમિયાન ખેતર માલિક સહિત કેટલાક શખ્સો વાહનો લઈને ફરાર થઈ ગયા હતા. હવે સમગ્ર મામલે પોલીસે વધુ તપાસ હાથ ધરી છે. “ખેરાલુના લીમડી ગામે થયેલા આ હાઈપ્રોફાઈલ જુગારકાંડમાં આગળ શું કાર્યવાહી થાય છે, તેના પર સૌની નજર છે.”