Continue on Our Mobile App

મહેસાણા જિલ્લાના ખેરાલુ તાલુકાના મિયાસણા ગામ નજીક મોડી રાત્રે ફાયરિંગની ચકચારી ઘટના સામે આવી છે.ફાયરિંગની ઘટનામાં કનુસિંહ પરમાર નામના વ્યક્તિને ગોળી વાગતા તેઓ ગંભીર રીતે ઈજાગ્રસ્ત થયા છે.મળતી માહિતી મુજબ,કનુસિંહ પરમાર પોતાના ખેતર તરફ પગપાળા જઈ રહ્યા હતા.તે દરમિયાન ખેતરમાં છુપાયેલા અજાણ્યા શખસોએ તેમના પર દેશી એકનાળી બંદૂકથી ફાયરિંગ કર્યું હોવાની પ્રાથમિક માહિતી સામે આવી છે. ફાયરિંગમાં કનુસિંહને પેટના ભાગે ગોળી વાગી હતી.ઈજાગ્રસ્ત હાલતમાં તેમને પ્રથમ વડનગર સિવિલ હોસ્પિટલમાં સારવાર માટે ખસેડવામાં આવ્યા હતા.ત્યારબાદ વધુ સારવાર માટે અમદાવાદ સિવિલ હોસ્પિટલમાં રીફર કરવામાં આવ્યા હતા.મળતી માહિતી પ્રમાણે અમદાવાદ સિવિલમાં તબીબોની ટીમ દ્વારા તેમનું ઓપરેશન કરવામાં આવ્યું છે.ઘટનાની જાણ થતાં ખેરાલુ પોલીસ સહિત SOG અને LCBની ટીમો ઘટનાસ્થળે પહોંચી હતી.સાથે જ ડોગ સ્ક્વોડની મદદથી પણ તપાસ હાથ ધરવામાં આવી હતી. સમગ્ર મામલે પોલીસે રાત્રી દરમિયાન વિસ્તારમાં સઘન કોમ્બિંગ હાથ ધર્યું હતું.પોલીસના જણાવ્યા પ્રમાણે ફાયરિંગમાં એક જ રાઉન્ડ ફાયરિંગ થયું હોવાનું સામે આવ્યું છે.આ મામલે પોલીસે બે શંકાસ્પદ વ્યક્તિઓની અટકાયત કરી તેમની પૂછપરછ શરૂ કરી છે. ફાયરિંગ પાછળ અંગત અદાવત છે કે અન્ય કોઈ કારણ, તે અંગે પોલીસ તપાસ ચાલી રહી છે. DySP મિલાપ પટેલના જણાવ્યા પ્રમાણે ફરિયાદી દ્વારા પોલીસ સમક્ષ ફરિયાદ આપવામાં આવી છે અને ફાયરિંગનું ચોક્કસ કારણ તથા આરોપીઓ કોણ છે તે અંગે વધુ તપાસ હાથ ધરવામાં આવી રહી છે.